Viðburðurinnn var haldinn í Stapanum, Hljómahöll og mættu tæplega tvö hundruð gestir.
Páll Erland, forstjóri, opnaði fundinn og bauð gesti velkomna og Þórhildur Eva Jónsdóttir tók í kjölfarið við fundarstjórn.
Friðjón Einarsson, stjórnarformaður félagsins, tók stuttlega til máls og fjallaði um hvernig Hitaveita Suðurnesja hefur gengt lykilhlutverki í uppbyggingu og dreifingu jarðhita á Suðurnesjum og mætt vaxandi eftirspurn á skilvirkan hátt.
Sigrún Inga Ævarsdóttir, samskipta og markaðsstjóri fór með gesti aftur í tímann og rifjaði upp sögu þeirra veitusvæða sem HS Veitur þjóna í dag og hvernig sagan og uppbyggingin hófst í raun fyrir ríflega 120 árum síðan.
Páll Erland steig aftur á svið og fjallaði um HS Veitur dagsins í dag, hlutverk fyrirtækisins þegar kemur að því að veita viðskiptavinum aðgengi að tærum og endurnýjanlegum auðlindum og hvernig HS Veitur eru leiðandi í þróun og framförum í sínum veiturekstri.
Jóna Hrefna Bergsteinsdóttir, framkvæmdastjóri mannauðs og innri þjónustu steig næst á svið og fjallaði um þær fjölmörgu áskoranir sem blasa við í náinni framtíð og hvernig fyrirtækið undirbýr sig nú til að vera í stakk búið til að mæta þeim.
Að lokum steig Jónas Dagur Jónasson, framkvæmdastjóri viðskiptaþróunar á svið og fór með gesti inn í framtíðina og þá þróun sem horft er til þegar kemur að rekstri snjallra veitukerfa.
Að loknum kynningum var gestum boðið upp á léttar veitingar og boðið upp á sýningu af ýmsum munum sem við koma starfseminni bæði nú og í fyrri tíð.
